Euskararen Eguna Elgoibar Ikastolan
Bihar Euskararen Eguna ospatuko dugu Elgoibar Ikastolan, eta berriro ere agerian utziko dugu euskara ez dela soilik hizkuntza bat, baizik eta komunitatea ehuntzen duen haria, harremanak eraikitzen dituena eta gure egunerokoari zentzua ematen diona.
Ikastola osoan zehar antolatutako egitarauaren bidez, txikienetatik handienetara, ikasleek euskaraz bizitzeko, sortzeko eta partekatzeko aukera izango dute. Antzerkia eta ipuinak, pregoia eta kantuak, jolasak eta dantzak uztartuko dira, etapa eta adin ezberdinak elkartuz, euskara bizipen partekatu bihurtuta.
Azaroaren amaieraz geroztik euskal sortzaileen bisitek eman diote hasiera ospakizunari, eta gaur ikasle eta ikasle ohien ahotsak eta gogoetak ere izan dira entzungai Herriko Antzokiko mahai-inguruan. Horren guztiaren bidez, euskararen iragana, oraina eta etorkizuna lotu nahi ditugu, hizkuntza bizia delako eta belaunaldiz belaunaldi eraikitzen delako.
Bihar euskara aldarrikatzeko eguna izango da, baina batez ere euskaraz bizitzen jarraitzeko konpromisoa berritzeko unea. Gure ikasleen irribarreetan, elkarlanetan eta ahotsetan ikusten dugulako euskarak baduela biharra... eta biharra guztion artean eraikitzen dugu.
Gora Euskararen Eguna Elgoibar Ikastolan! 🎈🗣️
