Felix Etxeberria “Parapan” Elgoibar Ikastolako sortzaile eta sustatzaileetako bat izan zen, euskaltzale sutsua eta ikastolaren proiektuarekin erabat konprometitutako pertsona. Bere bizitzan zehar erakutsitako atxikimendu horren adierazgarri, bere ondarearen zati bat, Muskurutxun kokatutako lursail bat, ikastolari dohaintzan utzi zion.
Dohaintza hau aukera paregabea da guretzat, ez bakarrik bere ekarpena aitortzeko, baizik eta etorkizunera begira balio handiko espazio bat garatzeko. Gure asmoa da, Baso Biziak Elkartearekin elkarlanean, lursail hori ikastolako egungo eta etorkizuneko ikasleentzat erreferentziazko gune bihurtzea: gure sustraiak sendo mantentzeko, egindako lana aitortzeko, eta ikuspegi ekologista zein naturarekiko sentsibilitatea lantzeko balioko duen eremu bizia
Helburu horrekin, lehen urrats gisa, apirilaren 25ean, larunbatean, lursailaren zainketa eta txukuntze lanak abiatu genituen. Ikastolako komunitateko hainbat bolondres bertaratu ginen ingurua ezagutu eta garbiketa lanak egitera. Eguraldia alde, goiz polita igaro genuen eta txikienek ere gozatu zuten. Indarberritzeko, mokadutxo batekin eman genion amaiera goizari.
Benetako esperientzia izan zen.
