Urrunera begira jartzeko moduko astea bizi izan dute ikastolako DBH 3. mailako ikasleek Erasmus + proiektuaren baitan. Hainbat elkar ezagutzez, ekintzaz, elkalanez eta batez ere hainbat eta hainbat bizipenez beteriko astea izan da, Martinikako eta Turkiako ikasleak gure artean jaso eta elkarrekin bizi izan duguna.
Eleaniztasuna eta kulturartekotasuna lantzen urte askotan pilatutako esperientzia baliatuz nazioartean ezaguna den ERASMUS+ proiektuan murgildu da aste honetan Elgoibar Ikastola.
Aurten hasi eta datorren ikasturte amaierara arte luzatuko den proiektua “The Young can be The Gentle Online and elsewhere” izenburupean ari da gauzatzen. Gai nagusia ziberbullyinga edo ziber-jazarpena da eta honen inguruko lanketa egiten dihardute DBH3. mailako ikasleek. Jakina den bezala, proiektua nazioarteko beste bi ikastetxerekin elkarlanean burutzen ari dira: Turkiako Istanbul Anadolu Lisesi institutuarekin eta Martinikako Lycée Pro Léopold Bissol institutuarekin, hain zuzen ere.
Abenduan Martinika uharteak bisitatu ondoren, Elgoibarren batu dira aste honetan hiru herrialdeetako ikasleak, martxoaren 20tik 25era bitartean, eta tarte horretan askotariko ekintzetan parte hartu dute proiektua garatzen jarraituz, gure kulturan murgilduz eta gure txokoak ezagutuz.
Hau guztia Elgoibar Ikastolaren gidaritzapean eta Elgoibarko Udalaren laguntzaz ahalbideratu da.
Horra astean bildutako irudiak:
