Beste astebetez gure ikasleek arlo ezberdinetan egin duten lanketa biribiltzeko helburuz irteera- eta emanaldi-pedagogikoak izan dituzte. Hona hemen laburpena.
Aste hasieran LH6. mailakoak makina erraminta museora egin dute irteera. Natur- eta gizarte-zientzia arloetan lantzen ari diren makinen gaian sakontzeko helburuz antzinako makinak egungokoekin konparatzeko aukera izan dute bertatik bertara.
Asteartean, HH03 urteko neska-mutilek bere senitarteko eta lagunei ikasturtean zehar landutako kantuak eta dantzak eskaini diete ikastolako erdiko aretoan. Amaieran, urte guztian eginiko lanen eta ekintzen argazki-aurkezpenaz gozatzeko aukera izan dute bai umeek, bai nagusiek.
Asteazkenean, LH5. mailako ikasleak Arotz-Enea euskal barnetegira joan dira hiru eguneko egonaldiaz gozatzera. Bertan ikasleek autonomia garatzeko, beraien arteko harremanak sendotzeko eta, inguruneaz eta naturaz jabetzeko eta sentsibilizatzeko aukera izan dute.
Egun berean, DBH1. mailakoak Debara egin dute irteera trenez. Egun hauetako eguraldi sargoritik freskatzeko asmoz surfeko ikastaroaz gozatzeko aukera izan dute. Aldi berean, irteeran talde kohesioa, bizikidetza, ingurugiroa zaintzeko kontzientzia eta lagunen arteko harremanak sendotzea bideratu da.
Azkenik, HH05 urtekoak ostegun arratsaldean emanaldia eskaini diete erdiko aretora hurbildu diren guztiei. “Bagoaz oporretara” gaiaren barruan landu dutena dantzen bitartez agertu dute, HHko etapa atzean utzi eta LHra jauzia egin aurretik.
