Elgoibar Ikastolako “erreferente osoari” agurra egin diogu irailak 6 honetan, bere urtebetetze egunean, hainbat eta hainbat urtez tinko lanean jardun ondoren erretiroa hartu baitu gaur Jabier Larrañaga ikastolako zuzendariak.
Langile ohiek eta gaur egungo lantaldeak ikastolako erdiko aretoan bildurik eman diogu agurra Jabierri ekitaldi xume bezain berezian. Kristina Bernalek aipatu duen gisa, erreferente pedagogiko aparta izan da Jabier, bere lanerako tinkotasunarekin batera ikastola norabide egokian jartzen asmatu duena bere gidaritzapean.
Guztiok kantatu diogun habaneran aipatu zaio bere irakasle aldian egindako lana, baina, batik bat, zuzendaritza taldean egindako ekarpenengatik nabarmendu da Jabier azken urteetan, ikasketa buru eta, batez ere, zuzendari gisa. Bere eskutik etorri dira ikastolara azken urteetako berrikuntza pedagogikoak.
Ikastolako buruak merezitako atsedena hartuko du hortaz. Goza dezala orain irekitzen zaion aldi berri honetaz. Jakin badakigu zaletasunik ez duela falta horretarako. Aho batez kantatu diogun bezala, denbora librea zorionera mugatzea izango du aurrerantzean eginkizun bakar.
Eskerrik asko, Jabier
