Eleaniztasuna eta kulturartekotasuna lantzeko helburuarekin onartu zuen Elgoibar Ikastolak Erasmus+ programaren partaide izateko erronka eta duela urtebete inguru hartutako bide horretan, pausu berri bat iritsi da. Gaur hasi eta aste guztian zehar, ikastolako hainbat ikasle Turkiako Istambul Anadolu Lisesi ikastetxean izango dira.
Hezkuntza, prestakuntza, gazteria eta kirola bultzatzeko Europa mailako proiektu honetan, hiru helburu nagusi landuko dituzte: tresna teknologikoen erabilpenean trebatzea, ziberjazarpena aztertzea eta partaideon esperientzia eta jarduera onak bilduko dituen web orria garatzea.
Zibersegurtasunaren gaia landu eta gazteen jokabidea aztertzea eta garatzea izango dituzte jomuga. Ikasleen eguneroko jardunean eta garapenean eragina duen arazo bat behatuz, aztertuz eta prebentziorako materiala sortuz eta zabalduz, besteak beste.
Ikastetxe, herri eta ikasleen elkar ezagutza bermatzeko aukera paregabea.
Bidaia eta esperientzia on!
