Igandean Mutrikutik Ondarrura haurren mendi irteera izan zen Morkaikok Ikastolako eta Herri Eskolako gurasoekin batera antolatua.
Goizean Lurraldebuseko autobusean iritsi ostean Mutrikura, handik, oinez abiatu ziren Ondarroa aldera.
Joan zen urteko mendi irteeretan ez bezala, aurten, ikasturte honetako mendi irteera gehienetan gertatu den bezala, oraingoan ere eguraldi ederraz gozatzeko aukera izan zuten.
Eguraldi eguzkitsua lagun, 30 haur eta beste horrenbeste nagusi Mutrikuko plazatik Galdonamendiruntz jo zuten itsaso hertzetik. Bide lasaia bezain ederra.
Galdonamendiko kanpinean indarberritu ondoren, Saturraneko hondartzara jaitsi eta handik itsas hertzeko paseotik Ondarroara heldu ziren. Goiz pasa ederra eginda, bazkal ordurako etxean ziren.
Datorren irteera martxoaren 10ean izango da, Elgoibar-Azitain artekoa.
