Pasa den igandean, martxoak 10, Morkaiko M.E.-ak antolatutako haurren mendi irteera izan zen. Eguna triste samar esnatu zen, baina ateri, eta 12 haur eta beste horrenbeste nagusi Kalegoen plazatik abiatu ziren Sigma aldera.
Haserako asmoa Elgoibartik abiatu eta Azitainera joatea zen. Baina azken egunetako euriak zirela eta, Saturixo erreka hasita zetorren eta ezin izan zuten igaro. Hori dela eta, ibilbidea aldatu eta Morura jo zuten, bertako aldaparok igo eta San Pedrora iristeko. San Pedrotik kalera errepidez jaitsi beharrean, Errotatxora jaitsi ziren mendiz. Igande goiz pasa ederra burutu zutena!
Hurrengo irteera, berez, apirilak 14an Aitztxikira pentsatutakoa zen. Baina egun horretan Jose Gurrutxaga krosa dela eta, datorren irteera hilaren 28an Erlora izango da. Aurten Euskal Mendi Federazioak 100 urte bete ditu eta 100 tontorretara igotzeko proposamena aurkeztu duela aprobetxatuz, Elgoibartarrok Erlora joango gara.
