Hezkuntza sisteman erreferente izaten eta gizartean eragiten jarraitzeko eta biharko munduan ikastolak egoki kokatzeko helburuz egingo den VII. Batzarra prestatzen hasita daude ikastolak. Hurrengo hamarraldian egin beharreko urratsak aztertu eta erabakiak hartuko dituzte ekainean izango den bilkura horretan.
Batzarra prestatzeko, alabaina, lehen urratsa barne dokumentu bat idaztea izan da. Bertan, azken hamar urteotako errepasoa egin da, egungo egoera azaltzen da, eta etorkizunerako aurreikuspen bat ere egiten da. Ikastolen Elkarteko Artezkaritza Kontseiluak osatu du dokumentua.
Ondoren, ikastolek epe bat izango dugu barne dokumentua aztertu, eztabaidatu eta proposamenak eta ekarpenak egiteko. Guztiak bilduta, plan estrategikoa diseinatzeari ekingo zaio ondoren. Prozesua, Ikastolen VII. Batzarra egiten denean amaituko da.
Eztabaida edo gogoeta prozesu hau arrakastatsua izan dadin, ikastolen mugimenduaren parte-hartze zabala gakoa izango da, eta Ikastoletako komunitatearen inplikazioa bilatu nahi da. Horretarako, eskualdekako bilerak eta ikastola bakoitzak bere gogoeta propioa egiteko prozesuan murgilduta gaude.
Aste honetan izan da helburu horrekin gurean antolatu den lehen bilera. Bertara deituak ginen Elgoibar Ikastola osatzen dugun familia eta langile oro. Irudian azaltzen den eran, taldeka jarrita hasi genion barne dokumentu horren azterketari.
