Aurten, Elgoibar Ikastolan, guretzat urte berezia da, Kilometroak jaia antolatuko baitugu. Horregatik, aurtengo Euskal Inauteria ohikoa baino bereziagoa izan da. Jai giroan kolore eta musika bereziak izan ditugu, izan ere, herriko dultzaineroak eta erraldoiak batu zaizkigu ospakizunera, festa giroa are gehiago alaituz.
Aurten, gainera, aitortza berezia egin diogu Regina Arrietari, gure Ikastolako musika irakasle izandakoari, 37 urteko ibilbidean euskal inauteria sustatzen egin duen lan nekaezina eskertuz. Barikuko ekitaldian, Olatz Astigarraga Ikastolako Errektore Kontseiluko lehendakariak eskerrak eman zizkion Arrietari euskal kulturari egindako ekarpen oparoarengatik.
Hunkituta, Arrietak talde-lanaren garrantzia azpimarratu zuen, eta urte hauetan guztietan berarekin batera aritu garen lagun guztiak gogora ekarri zituen. Euskal kulturaren sustapena eta gure komunitatearen batasuna ospatzen jarraitzeko gogoz gaude!
