Bretainiako (Frantzia) ikasleekin elkartrukea martxan!
DBH2ko eta DBH4ko ikasleek Kemper herriko Diwan eskola bateko ikasleekin elkartruke zoragarri bat biziko dute! Lehenengo pausua eman dugu: familiak izendatu ditugu, lehen gutunak jaso ditugu eta erantzunak idazten ari gara. Aldi berean, proiektua hainbat dinamiken bidez lantzen ari gara, hala nola, euskal kulturaren erakusgarri izango diren muralak sortuz.
Diwan sareko eskoletan bretoiera hizkuntza nagusi denez, esperientzia honek hizkuntza gutxituen biziraupena eta Europako aniztasuna ezagutzeko aukera eskainiko die gure ikasleei. Kultura eta hizkuntza aniztasuna aberastasun bat da, eta elkarlanak ezagutza eta hausnarketa partekatua sustatzen du. Aurrera begira, emozioz eta jakin-minaz beterik gaude!
