LH6ko ikasleek musika eta antzerkia uztartu dituzte Pentagrama Enea ipuinaren bidez
Azken hilabetean, Lehen Hezkuntzako 6. mailako ikasleek Musika arloko proiektu berezi bat garatu dute: gelaka antzerkiak sortu eta antzeztu dituzte, Pentagrama Enea ipuina oinarri hartuta. Ekimen honen helburua izan da Lehen Hezkuntzako 1. mailako ikasleei musika-notak eta lengoaia musikala modu erakargarrian irakastea.
Prozesu guztian zehar, LH6ko ikasleak gustura eta motibatuta aritu dira, bai antzerkiak prestatzen eta antzezten, bai LH1eko ikasleek euren lanaz gozatzen zutela ikusita. Haurrek nota bakoitzari lotutako kanta eta dantza bana prestatu dute, eta horiek elkarrekin ikasi eta aurkeztu dituzte, musikaz eta mugimenduz beteriko saio dibertigarrietan.
Ekimenari amaiera borobila emateko, LH1eko ikasle bakoitzak opari berezi bat jaso du: LH6ko ikasleek sortutako pentagrama dibertigarriak, non notak kokatu eta tokiz mugitu daitezkeen. Material honek jolaserako aukera emateaz gain, musikaren oinarrizko kontzeptuak modu bisual eta dinamikoan ikasteko aukera eskaintzen du.
Ekimen honek balio izan du ikasleen arteko elkarlana, sormena eta ikaskuntza esanguratsua sustatzeko. Zalantzarik gabe, esperientzia aberasgarria eta ahaztezina izan da parte-hartzaile guztientzat.
