GUSTOS proiektua: elikagai-xahuketaren aurkako urratsak jangelan
Ikastolan berrikuntza garrantzitsu bat dugu jangelan: GUSTOS proiektua martxan jarri dugu. Gure eguneroko ohituretan kontzientzia handiagoa eta jasangarritasuna txertatzea da helburua, aldaketa benetakoa jantokitik hasten dela sinesten baitugu.
Zer da GUSTOS?
Euskal Herriko eta Kataluniako 20 eskola-jantokitan elikagai-xahuketaren prebentzioa eta murrizketa bultzatzen duen Europa mailako proiektua da. Ekimen honek eskola-jantokia hezkuntza-gune estrategiko bihurtu nahi du, elikadura osasungarri eta jasangarriaren alde.
Zein da helburua?
2027a baino lehen, gure jangelan alferrik galtzen den janaria %15 murriztea lortu nahi dugu. Erronka hau hezkuntza-komunitate osoaren parte-hartzearekin gauzatuko dugu: ikasleak, jantokiko langileak, irakasleak eta familiak.
Nola egiten ari gara?
Ikastolan bi jarduera-ildo nagusi garatzen ari gara:
1. Hezkuntza-esku-hartzeak
- Jantokiko langileentzako prestakuntza espezifikoa.
- Eguerdiko tartean jolas didaktikoak, ikasleek kontzientzia har dezaten.
- Metodologia pedagogiko eraldatzaileak komunitate osoarentzat.
2. Esku-hartze gastronomikoak
- Errezetak eta elaborazioak berdiseinatzea sukaldaritza-taldearekin batera.
- Razioak doitzea, adin bakoitzari dagokion kantitate egokia zerbitzatzeko.
Horrez gain, xahuketa neurtzen ari gara 10 eguneko saioetan, esku-hartzeen eragina aztertzeko eta zein elikagai galtzen den gehien identifikatzeko.
Zer irabazten dugu parte hartuta?
- Benetako datuetan oinarritutako diagnosia izatea.
- Ikasle eta familien ingurumen-kontzientzia sakontzea.
- Hezkuntza-material eta jarduera espezifikoak jasotzea.
- Ikastola jasangarritasunarekiko konprometitu gisa errekonozitua izatea.
