DBH 3ko ikasleek Mugikorrik Gabeko Astea egingo dute
DBH 3. mailan martxan jarri dugun Proiektu komunitarioa arloan, ikasleak mugikorraren erabilerari buruz hausnartzen ari dira azken asteotan. Teknologiak gure egunerokoan duen eraginaz jabetu, ohiturak aztertu eta erabilera arduratsuago baterako bideak bilatzea dute helburu.
Hausnarketa prozesu horren baitan, aste honetan ekimen berezi bat hasiko dute: Mugikorrik Gabeko Astea. Ekimenaren bidez, ikasleek astebetez mugikorra ikastolan uzteko konpromisoa hartu dute, beren eguneroko bizipenetatik abiatuta gogoeta sakonagoa egiteko.
Proposamen honen helburua ez da teknologia baztertzea, baizik eta haren erabilera kontzienteagoa sustatzea. Esperientzia honek ikasleei aukera emango die harremanetan, aisialdian eta eguneroko jardunean mugikorrak duen presentziaz ohartzeko, eta alternatiba osasungarriak esperimentatzeko.
Astea amaitzean, bizitakoa partekatu eta ondorioak aterako dituzte, ikaskuntza esanguratsua eraikitzeko asmoz.
Ikastolako komunitate osoari ekimen honetan bidelagun izatea eskertzen diogu.
