Muskurutxuko “Parapan” lursailaren inaugurazio ofiziala | Maiatzak 23
Felix Etxeberria “Parapan” Elgoibar Ikastolako sortzaile eta sustatzaileetako bat izan zen, euskaltzale sutsua eta ikastolaren proiektuarekin erabat konprometitutako pertsona. Bere bizitzan zehar erakutsitako atxikimendu horren adierazgarri, bere ondarearen zati bat, Muskurutxun kokatutako lursail bat, ikastolari dohaintzan utzi zion.
Dohaintza hau aukera paregabea da guretzat, ez bakarrik bere ekarpena aitortzeko, baizik eta etorkizunera begira balio handiko espazio bat garatzeko. Gure asmoa da, Baso Biziak Elkartearekin elkarlanean, lursail hori ikastolako egungo eta etorkizuneko ikasleentzat erreferentziazko gune bihurtzea: gure sustraiak sendo mantentzeko, egindako lana aitortzeko, eta ikuspegi ekologista zein naturarekiko sentsibilitatea lantzeko balioko duen eremu bizia.
Horregatik, maiatzaren 23an Muskurutxuko lursailaren inaugurazio ofiziala ospatuko dugu, eta ikastolako komunitate osoari bertaratzeko gonbidapena luzatu nahi dizuegu.
EGITARAUA
Elkargunea:
9:00: Elgoibar Ikastola / 9:15 Otsaurtia
10:00 - 10:30 – Inaugurazio ofiziala
10:30 - 13:30 – Mendi buelta
Ondoren, mendi buelta txiki bat egingo dugu eta talde argazkia aterako dugu, “50 tontor” ekimenarekin bat eginez.
Ekimen hau 2026ko Kilometroak jaiaren 50. edizioaren baitan antolatu da. Izan ere, duela mende erdi Lazkaon ospatu zen lehen aldiz Kilometroak jaia, eta 50. urteurrena ospatzeko Gipuzkoako ikastolen artean hainbat egitasmo jarri dira martxan. Horietako bat da “50 tontor” ekimena: ikastola bakoitzak bere inguruko tontor edo paraje esanguratsu batera igoera egitea, komunitatearen eta ikastolen mugimenduaren indarra sinbolikoki irudikatzeko.
Muskurutxuko lursaila eta Felix Etxeberriaren ekarpena ezin egokiagoak dira ospakizun eta aitortza horrekin bat egiteko.
Antolaketa errazteko, eskertuko genizueke bertaratzeko asmoa izango bazenute ostegun honetarako hurrengo GALDETEGIA betetzea.
Mila esker aldez aurretik zuen parte-hartzeagatik eta bertan ikusiko garelakoan!
