Joan den maiatzaren 23an Muskurutxuko “Parapan” lursailaren inaugurazio ofiziala ospatu genuen Elgoibar Ikastolako komunitateko hainbat kidek lagunduta. Eguraldi bikainak eta giro apartak lagunduta, goiz ederra partekatzeko aukera izan genuen naturan, emozioz eta esanahiz betetako ekitaldi batean.
Ekimenaren bidez, Felix Etxeberria “Parapan” gogoratu eta omendu nahi izan genuen. Elgoibar Ikastolako sortzaile eta sustatzaileetako bat izan zen, euskaltzale eta ikastolaren proiektuarekiko erabat konprometitutako pertsona. Bere ondarearen zati bat ikastolari dohaintzan utzi izanak aukera paregabea eskaini digu etorkizunera begirako espazio berezi bat eraikitzen hasteko.
Goizeko lehen orduan elkartu ginen, eta ondoren inaugurazio ekitaldiari ekin genion. Bertan izan ziren hitzak, bertsoak eta oroigarri moduan jarritako plakaren inaugurazioa. Une hunkigarriak bizi izan genituen, komunitatearen eta belaunaldien arteko loturaren adierazgarri.
Ekitaldiaren baitan, zuhaitz bat ere landatu genuen, etorkizunarekiko konpromisoaren, sustraien eta komunitatearen sinbolo gisa. Keinu xume baina esanguratsua izan zen, lursail honi eman nahi diogun bizitasunaren eta jarraipenaren adierazle.
Ekitaldiaren ondoren, mendi buelta txiki bat egin genuen inguruan zehar eta talde argazkia atera genuen “50 tontor” ekimenarekin bat eginez. Ekimen hau 2026ko Kilometroak jaiaren 50. edizioaren baitan antolatu da, Gipuzkoako ikastolen komunitatea eta sustraiak naturarekin lotuz.
Muskurutxuko lursaila etorkizunean ere bizirik mantentzeko eta hezkuntza, natura eta komunitatea uztartuko dituen espazio bihurtzeko asmoarekin jarraitzen dugu. Lehen urrats hau, zalantzarik gabe, berezia eta esanguratsua izan da.
Eskerrik beroenak bertaratu eta ekimena posible egin zenuten guztioi.
