Elgoibar Ikastola Erasmus + proiektuan murgilduta
Eleaniztasuna eta kulturartekotasuna lantzen urte askotan pilatutako esperientzia baliatuz (hortxe da, horren isla, Litherland High Schoolekin 20 urtez! izan dugun Elkartrukea programa), eta helburu eta asmo horiei segida eman nahian, ikasturte honetan nazioartean ezaguna den ERASMUS+ proiektuan murgilduta dago Elgoibar Ikastola.
Aurten hasi eta datorren ikasturte amaierara arte luzatuko den proiektua “The Young can be The Gentle Online and elsewhere” izenburupean ari da gauzatzen. Gai nagusia ciberbullyinga edo ziber-jazarpena da eta honen inguruko lanketa egiten dihardute DBH3. mailako ikasleek. Proiektua nazioarteko beste bi ikastetxerekin elkarlanean burutzen ari dira: Turkiako Istanbul Anadolu Lisesi institutuarekin eta Martinikako Lycée Pro Léopold Bissol institutuarekin, hain zuzen ere.
Elgoibarko ikasleen ordezkari talde bat abenduan izan zen Martinikako lehenengo egonaldian, eta, orain, Elgoibar Ikastola da anfitrioi lanetan jardungo dena. Turkia eta Martinikako ikasleak hemen izango dira martxoaren 20tik 25era bitartean, eta tarte horretan askotariko ekintzetan parte hartuko dute proiektua garatzen jarraituz, gure kulturan murgilduz eta gure txokoak ezagutuz. Hau guztia Elgoibar Ikastolaren gidaritzapean eta Elgoibarko Udalaren laguntzaz bideratuko da.
Irudian, Martinikara abiatu zen ordezkaritza:
