Azpeitiko Ekoetxean ikasturte amaierako txangoa
Pasa den ostiralean, ikastolako ikasleek ikasturte amaierako txangoa Azpeitiko Ekoetxean egin zuten. Bertako langileek harrera beroa egin zieten, eta hiru multzotan banatuta, hondakinen gaia lantzen aritu ziren. Sortzen diren hondakinen inguruko kontzientzia piztu nahian, hondakinak sailkatu ezean non amaitzen diren eta sailkapen egokiaren garrantziaz ohartarazi zieten.
Bestalde, xaguzaharrek ingurumenean betetzen duten funtzioa eta naturan duten garrantzia ezagutzeko aukera izan zuten. Horren harira, ipuin bat entzun zuten, eta ondoren, xaguzahar bihurtuta inguruko parkean jolasean aritu ziren.
Jarduera guztiak amaituta, bidegorritik paseoan ibili ondoren, Azpeitiko plazan bazkaldu zuten, eta arratsaldean, inguruko bi parke desberdinetan jolasean aritu ziren ikasleak. Eguraldi ona lagun, egun zoragarri eta aberasgarria izan zuten.
