Elgoibar Ikastolak minutu bateko isilunearekin bat egin du Palestinako haurren alde.
Gaur goizean, Elgoibar Ikastolako komunitateak minutu bateko isilunea egin du Palestinako haurren eta familien alde, Gure Haurrak ere Badira plataformak deitutako ekimenaren baitan. Euskal Herriko ikastetxe eta ikastola askok bezala, gure komunitateak ere bat egin du elkartasun-keinu sinboliko honekin, bakearen eta justiziaren aldeko mezua helarazteko.
Isilunean, ikasleek beraiek egindako pankartekin hartu dute parte, eta une horretan gogoratu dugu gertatzen ari dena ezin dugula ahaztu, ezta isilik geratu ere. Gure ikasleei azaldu diegu keinu txiki honek adierazten duela elkartasuna, enpatia eta bakearen aldeko konpromisoa, balio horiek gure hezkuntza-proiektuaren parte direlako.
Ekimen hau ez da egun bakarreko ekintza izango. Ikastolan, urriaren 18ra arte, zapatak bilduko ditugu Palestinako haur guztien omenez eta elkartasunez. Ondoren, zapata guzti horiek urriaren 25eko manifestazio nazionalera eramango dira Bilbora, Euskal Herriko beste ikastetxe eta herritar askorekin batera.
Gure mezua argia da:
Bakearen, bizitzaren eta justiziaren alde; indarkeriaren, genozidioaren eta isiltasunaren aurka.
