Aurreko asteazkenean, azaroaren 26an, Ikastolen 29. Jardunaldi Pedagogikoak ospatu ziren Donostiako Kursaalen, “Bagatoz, inklusiotik ekitatera” goiburupean. Euskal Herri osotik iritsitako ia 600 hezkuntza profesionalek parte hartu zuten jardunaldietan, hezkuntza inklusibo eta ekitatezkoaren aldeko hausnarketa eta konpromisoa partekatuz.
Elgoibar Ikastolatik zuzendaria, orientatzailea eta ikasketa burua jardunaldietara joan ziren, inklusioa gure hezkuntza proiektuaren ardatz nagusietako bat delako eta ikasle guztientzako kalitatezko hezkuntza bermatzeko dugun konpromisoa sendotzeko asmoz.
Jardunaldietan argi azpimarratu zen aniztasuna aberastasun gisa ulertu behar dela, eta inklusioa ez dela helburu itxi bat, etengabeko konpromiso etiko eta pedagogikoa baizik. Lau ardatz nagusitan antolatu zen egitaraua: ikasgelako egokitzapenak eta irisgarritasuna, kulturaniztasuna eta identitatea, eskola erakundea ikuspegi inklusibotik, eta aisialdia nahiz jarduera fisikoa.
Horrez gain, euskara hezkuntza-sistema nazionalaren eta aniztasunaren erdigunean kokatzearen garrantzia ere nabarmendu zen, inor bazterrean utzi gabe komunitate osoa eraikitzeko giltzarri gisa.
Ikastolen Jardunaldi Pedagogikoek berriro ere agerian utzi dute ikastolen lidergo pedagogikoa eta berrikuntzarako bokazioa, eta Elgoibar Ikastolan ildo beretik jarraituko dugu, inklusioak, ekitateak eta euskarak gure eguneroko jardunaren iparra markatuko baitute.
