Elgoibar Ikastolak jaso berri du STEM School Labela aintzatespena. Errekonozimendu honek azken urteetan STEM arloetan (Science, Technology, Engineering and Mathematics) eginiko lanari merezitako aitortza egiten dio.
Zer da STEM School Labela?
STEM School Labela (ikastetxeetako zientzia-teknologia ikas-arloen gaitasun-zigilua) European Schoolnet-en baitako Scientix-en ekimena da. Hain zuzen, STEM gaietan (zientzia, teknologia, ingeniaritza eta matematikak) Europako ikastetxeen lan pedagogikoa diagnostikatzen laguntzeko, aitortzeko eta bikaintasuna bultzatzeko ekimena da.
Euskal Herrian, Irlandan, Kroazian, Letonian, Maltan eta Txekiar Errepublikan, guztira 37 ikastetxek lortu dugu Competent mailarainoko labela.
Elgoibar Ikastolaren kokapena
Elgoibar, bereziki, industria herria izan da betidanik; eta halaxe da gaur egun ere. Bertako jarduerarik garrantzitsuena makina-erremintaren ekoizpena da. Hori kontuan izanik, Elgoibar Ikastolaren helburua da bertan ikasten duten ikasleei beren testuingurura moldatzeko tresnak eta baliabideak eskaintzea.
Gure ikastolaren izaera berritzailea eta eraldatzailea izanik, azken urteetan apostu handia egin dugu STEM arloekiko eta, bereziki, horietan nesken presentziarekiko. Ikasleen orientazioa egitean, esaterako, herrian dauden hainbat enpresa zein makina-erraminta eskola bisitatzen dira.
Elgoibar Ikastolaren ibilbidea STEM barruan
STEM arloetan lan handia egiten ari da aspaldian Elgoibar Ikastola. STEM School Label zigilua lortu baino lehen gure ikasleek garatutako proiektuek eta eginiko ahaleginak izan dute beren aitortza, aipagarrienetakoa 2020an Eusko Jaurlaritzaren STEAM zigiluaren lorpena izanik. Hori gutxi ez, eta ordutik urtetik urtera errekonozimendu hori erdiesteko lanean jarraitu dugu proiektu ezberdinak aurkeztuz.
Bestalde, STEAM-Sare ekimeneko partaide gisa, 2019an gure ikasleek garatutako “Kargagailu fotoboltaiko”en proiektua gauzatzeko Arabako Parke Teknologikoan kokatua dagoen CIC-Energigune enpresarekin elkarlana lortu genuen. Proiektu hartan, gure ikasleek diseinatutako kargagailuak Arabako enpresarekin elkarlanean gauzatzeko ahalegina egin zen, baina, Covid-19ak proiektua bere osotasunean gauzatzea ekidin zuen. Hartu-eman hura gauzatzeko aukerarik ez izan arren, Elgoibar Ikastolak ez zuen proiektua bertan behera utzi, eta egokitzapen batzuk egin ostean, plaka-fotoboltaiko txikiak erosi eta proiektua aurrera ateratzea lortu zuen.
Argazkia: proiektuaren barruan ikasleen motibazioa pizteko kanpo espazioan egin zen murala ikusgai.
Azken urteetan Eusko Jaurlaritzako Hezkuntza Sailak sustatutako STEAM Euskadi Estrategiaren barruan dagoen eta STEAM Hezkuntza programaren osagarria den STEAM Sare proiektuan ere hartu dugu parte. Tailer hauen helburua ikastetxeen eta enpresen arteko harremana sendotzea da, eta gurean Mondragon Unibertsitatearekin eta Iberdrola enpresarekin saretzea lortu dugu.
STEAM gaiekin lotura zuzena duten beste hainbat ekimenetan murgildurik jarraitzen dugu: Emakume Zientzialarien Nazioarteko Egunaren aldarrikapenean, Elgoibarko udalak antolatzen duen Zientzia Azokan, Debegesako STEAM Erronkan, enpresa eta unibertsitateekin elkarlan ezberdinak, STEAM-Sare sareko partaide… Hauek guztiak goraipatu dituzte osoki ingelesez garatu den STEM School Label prozesuan.
